Аб праекце

Касцюкоўшчына – багаты літаратурны край. Яркія, зорныя імёны ў кожным яе куточку. Саматэвічы – народны паэт Беларусі Аркадзь Куляшоў, Вялікі Бор – народны пісьменнік Беларусі Іван Чыгрынаў, Студзянец – паэт Аляксей Русецкі, Канічы – радзіма пісьменніка Васіля Хомчанкі, Клеявічы – пісьменнік Леанід Левановіч… І сярод згаданых яркіх, сапраўды зорных па свайму мастацкаму таленту імёнаў не згадана і паловы яркіх творчых асоб, чые творы чытаюцца, прымаюцца душою і сэрцам і праз гады пасля нараджэння вершаў, пасля нараджэння запамінальных радкоў.

Час не спыняе хады. Звонкія летнія ліўні змяняюцца залатымі восеньскімі мяцеліцамі, завейныя зімы – вясновымі сонечнымі дажджамі. Нязменна адно – памяць.

Таму хочацца прыпыніцца і ўзгадаць  імя знакамітага песняра блакітнага краю Алеся Уладзіміравіча Пісьмянкова. “Ёсць людзі, - гаварыў Навум Гальпяровіч,- надзеленыя ад прыроды ўсім – і ростам, і паставай, і прыгожай знешнасцю, і цудоўным голасам, і розумам, і талентам… Да такіх людзей належыў Алесь Пісьмянкоў”.  Паэта нарадзіла і ўзрасціла багатая на гісторыю, славутасцей  Бялынкавіцкая зямля. У вёсцы Бялынкавічы паэт зрабіў свае першыя крокі. Тут жа нарадзіліся і яго першыя радкі.

Няма паэта, ды жыве напісанае ім.

У знак светлай памяці Алеся Уладзіміравіча Пісьмянкова Бялынкавіцкай сельскай бібліятэкай дзяржаўнай установы культуры “Бібліятэчная сетка Касцюковіцкага раёна”  сумесна з цэнтральнай раённай бібліятэкай імя І. Чыгрынава створаны віртуальны музей “Алесь Пісьмянкоў: паэт і чалавек”, і прысвечаны ён жыццю паэта, яго літаратурнай спадчыне.

Пры падрыхтоўцы базы дадзеных выкарыстаны розныя крыніцы: матэрыялы, сабраныя бібліятэкарам Бялынкавіцкай сельскай бібліятэкі, атрыманыя ад мясцовых жыхароў пад час гутарак, артыкулы з перыядычнага друку, матэрыялы ДУК “Бібліятэчная сетка Касцюковіцкага раёна”, матэрыялы краязнаўчага музея ДУА “Бялынкавіцкая сярэдняя школа Касцюковіцкага раёна”, УК «Касцюковіцкі краязнаўчы музей», электронныя рэсурсы інтэрнэта.

Электронны рэсурс складаецца з пяці раздзелаў: “Аб праекце”, “Жыццё”, “Творчасць”, “Памяці паэта”, “Бібліяграфія”. Матэрыялы кожнага ахопліваюць розныя бакі шматграннай жыццёвай і творчай дзейнасці Алеся Пісьмянкова, узнаўляюць малавядомыя факты і істотна дапаўняюць выкладзеную ў даведніках біяграфію творцы. Шматлікія звесткі падмацаваны ўспамінамі родных, сяброў і калег па пяру, інтэрв’ю, лістамі, дзённікамі, архіўнымі дакументамі, матэрыяламі, фотаздымкамі.

Раздзел “Жыццё” складаецца з тэматычных блокаў, у якіх змешчаны матэрыялы аб жыцці Алеся Пісьмянкова, яго аўтабіяграфія і біяграфія. Тут жа прадстаўлены дакументы, узнагароды, лісты, запрашэнні, віншаванні да паэта. Таксама раздзел змяшчае фотаздымкі з уласнага архіва паэта.  Асобным блокам у раздзеле сабраны кнігі з аўтографамі і дароўнымі надпісамі ад паэтаў, пісьменнікаў, падараваныя Алесю Пісьмянкову. Яшчэ адзін блок раздзела прысвечаны  аўдыязапісам твораў паэта.

Раздзел “Творчасць” змяшчае ў сабе інфармацыю аб храналогіі выхаду кніг, артыкулы з перыядычных выданняў, рукапісы і машынапісы паэта з аўтарскай праўкай, таксама сюды ўвайшлі вершы Алеся Пісьмянкова, пакладзены на музыку кампазітарамі І. Раманчуком, В.Макеевай, М. Яцковым, В. Каваліным.

Раздзел “Памяці паэта” ўтрымлівае інфармацыю па ўшанаванню імя і памяці паэта, а таксама ўключае творы – прысвячэнні Алесю Пісьмянкову. 

Раздзел “Бібліяграфія” адлюстроўвае спіс матэрыялаў аб жыцці і творчасці Алеся Пісьмянкова.

Віртуальны музей дае магчымасць атрымання інфармацыі шырокаму колу карыстальнікаў, адрасаваны навучэнцам і настаўнікам, аматарам і майстрам мастацкага слова. У дадзенага рэсурса не толькі інфармацыйна-асветніцкая мэта. Яго місія заключаецца ў захаванні памяці і папулярызацыі культурнай спадчыны Алеся Пісьмянкова.

Паважаныя аматары і майстры мастацкага слова! Прадстаўленыя ў базе дадзеных матэрыялы могуць быць не поўнымі або ўтрымліваць недакладнасці. Калі вы знайшлі ў нашай базе памылку ці валодаеце дадатковымі матэрыяламі, адпаведнымі звесткамі аб славутым земляку, вялікая просьба звязацца з намі.

Гэта можна зрабіць па тэлефоне 8 (02245) 23 -778, ці па электроннай пошце - kostbibl@mogilev.by